L’Assemblada Occitana País Niçard sosten la crida en linha lançada per lo rassemblament ciutadan Viva per rendre lo Carneval de Niça tornarmai accessible e popular.
Coma o soslinha justament aquela crida, Carneval es «una fèsta populara e intempestiva, e mai transgressiva».
L’Assemblada Occitana País Niçard denóncia la politica de gentrificacion menada per la Vila de Niça a respècte d’aquela vielha tradicion niçarda, populara e celèbra. Especialament:
- Denonciam l’installacion dei palissadas que talhan la vila en doi per rendre inaccessible Carneval ai personas que pagan pas; aquò nos ramenta lo Mur de Berlin dau temps de la Guèrra Freia. L’accès pagant generalizat, a l’excepcion d’una pichina part gratuita unicament ai personas «mascadi de pèn en cima», lèva tot lo costat liure de Carneval.
- Denonciam lu prètz proïbitius dei bilhetas d’intrada qu’excluson de fach li familhas mai desfavorizadi e que transforman Carneval en eveniment reservat ai classas mai aisadi.
- Denonciam lo blocatge dei ais de transpòrt dau temps de Carneval, especialament de la linha 1 dau tramvai entre lu arrèsts Garibaldi e Massena, qu’aquò destorban pendent doi setmanas lu miliers d’usatgiers que manlèvan cada jorn aquesta via per anar au trabalh.
L’Assemblada Occitana País Niçard parteja li revendicacions de Viva tocant lo Carneval de Niça e incita li ciutadanas e lu ciutadans de Niça a signar la crida en linha.
Volèm un Carneval liure, popular, gratuit e accessible a toti e a toi!
Volèm un Carneval sensa barricadas ni linhas de demarcacion, ni fisiqui, ni sociali!
Volèm que Carneval si debane sus la Passejada dei Anglés, en permetent lo foncionament regular dau tramvai!