by Lo dimècres 15 de genoier passat, lo Tribunau Administratiu de Niça, sasit per lo prefècte, anullèt lo contracte signat per la metropòli per l’estatua de Joana d’Arc. La Vila de Niça la deu aüra retirar, e lo prestatari deu remborsar la soma que percebèt (170 000 € fòra taxas).
Lo tribunau repròcha a la metropòli d’aver passat un mercat emb l’Atalhier Missor, presentat coma un «collectiu d’artistas installats a Niça», sensa publicitat ni mesa en concurréncia.
L’Assemblada Occitana País Niçard si questiona sus:
- Li rasons d’un tau mancament que constituisse «un vici d’una particulara grevetat», coma o indica lo tribunau.
- Lo còst elevat que representa aquesta estatua.
- La pertinéncia d’una tala despensa non prioritària a respècte dei problèmas quotidians que pertòcan li niçardas e lu niçards.
Au delà, l’Assemblada Occitana País Niçard deplora que l’estatua, coma lo quartier e la glèia, pòrten lo nom de Joana d’Arc. Per remembrança, Joana d’Arc es una eroïna mitologica francesa qu’a pas minga rapòrt emb l’istòria dau País Niçard. L’eroïna emblematica de Niça non es Joana d’Arc, es Catarina Segurana.
L’Assemblada Occitana País Niçard saluda la decision dau tribunau e apròva l’obligacion de levar aquesta estatua. De mai, militam per que lo quartier repilhe lo sieu nom istoric de Fòntcauda.
